सुरेन गुरुङ
शिख । म्याग्दीको अन्नपूर्ण गाउँपालिका–५ आलखर्कमा रहेको गैटे झरना पर्यटकको पर्खाइमा रहेको छ ।
अन्नपूर्ण चक्रीय पदमार्ग अन्तरगत शिख गाउँदेखि एक घण्टा तीस मिनेट पैदलयात्रा गरेपछि पुगिने आकर्षक र मनमोहक झरना सुनसान छ । प्रचारप्रसार र पूर्वाधारको कमीले गैटे झरना ओझेलमा परेको झरनाको नजिकै रहेको घोस्केखोर लघुजलविद्युत परियोजनाका कर्मचारी कृष्ण पुनले बताउनुभयो ।
“यो झरनाको सौन्दर्य र विशेषताको प्रचारप्रसार हुन नसक्नु र आवश्यक पूर्वाधार नहुँदा ओझेलमा परेको हो,” उहाँले भन्नुभयो “घोडेपानी, पुनहिल, शिख, स्वाँतमा आउने पर्यटकलाई यो झरनासम्म ल्याउन सक्ने हो भने पर्यटन विकासका साथै छोटिएको पर्यटकको बसाई लम्बाउन सकिन्थ्यो ।”
खोपारा र ढाँडखर्कको फेदीमा घोस्केखोर र गैटे खोलाको दोभान नजिकैको यो झरना रहेको छ । करिब पचास मिटर अग्लो पहाडबाट छङछङ गर्दै सुसाउने झरनाको वरपर हरियाली जंगल छ । बस्ति देखि टाढा र एकान्त ठाउँमा रहेको झरनामा इन्द्रेणी परेको समयमा झनै आकर्षक देखिन्छ ।
झरना नजिकै बसेर तस्विर, दृष्य खिच्न, एकान्तमा रमाउन सकिन्छ । झरनादेखि दोभानसम्म कलकल गर्दै बग्ने खोलाको आवाजले प्रकृति प्रेमीहरुलाई लठ्ठै बनाउँछ । स्थानीयबासी र गाउँपालिकाका जनप्रतिनिधिहरु गैटे झरनाको पर्यटन विकास र प्रर्वद्धनमा जुटेका छन् ।
आलखर्कको नजिकैको बस्ति स्वाँत गाउँ हो । स्वाँतका अगुवा लोकबहादुर पुर्जाले झरना परिसरमा रहेको घोस्केखोर लघुजलविद्युतको भवनमा खाजा, चिया पसल सञ्चालन गरिएको र काठै काठको प्रयोग गरेर विश्रामस्थल बनाउन लागिएको बताउनुभयो ।
“शिख–स्वाँत–ढाडखर्क–खोपारा पदमार्गमा गैटे झरनालाई पनि समावेश गरिएको छ,” उहाँले भन्नुभयो “झरना अवलोकन गर्नेहरुको सुविधाका लागि विश्रामस्थल बनाउने काम भैरहेको छ ।” झरनादेखि दश मिनेट उकालो हिडेपछि पुगिने ठाउँमा होटल पनि सञ्चालन भएको छ ।
अन्नपूर्ण गाउँपालिका–५ का वडा अध्यक्ष राजेश तिलिजा पुनले स्वाँत हुदै गैटे झरना भएको आलखर्क जोड्ने पदमार्ग बनाएको बताउनुभयो । यसैगरी घोस्केखोर खोलामाथी झोलुङ्गे पुल बनाउन पहल गरेको बताउनुभयो । झरना नजिकै घोस्केखोर खोला वारपार गर्न काठको अस्थायी साँघु बनाइएको छ । एउटै रुख तेर्साएर वारपार गर्न सक्ने बनाइएको हो ।
हालै झरना अवलोकनका लागि पुग्नुभएका गाउँपालिकाका उपाध्यक्ष दिवा तिलिजा पुन, प्रमुख प्रशासकीय अधिकृत अमृत सुवेदी, ईञ्जिनियर ईश्वर भण्डारी लगायतको टोलीले पुर्वाधार निर्माण र प्रचारप्रसार मार्फत गैटे झरनालाई नयाँ पर्यटकीय गन्तब्य बनाउने प्रतिवद्धता जनाउनुभयो ।
