ताकम, । म्याग्दीको धवलागिरी गाउँपालिका–७ ताकममा एक वर्षपछि अस्पतालको भवन निर्माण योजना सूचारु भएको छ ।
२०७८ फागुन महिनादेखि रोकिएको अस्पताल भवन निर्माणको कामलाई निर्माण व्यवसायीले एक वर्षपछि निरन्तरता दिएका हुन् । धवलागिरी गाउँपालिका–७ ताकमका वडा अध्यक्ष अशोक खत्रीले एक वर्षपछि अस्पताल भवन निर्माण सूचारु भएको जानकारी दिनुभयो ।
“लामो प्रयासपछि निर्माण व्यवसायीलाई काममा फर्काएर अस्पताल भवन निर्माण सूचारु भएको छ,” उहाँले भन्नुभयो “भवन निर्माणलाई निरन्तरता दिन निगरानी, समन्वय र सहजिकरण गरेका छौ ।”
भवन निर्माणका लागि वि.स. २०७८ वैशाखमा बिएम–आइएस–एसी जेभी बुर्तिबाङ बागलुङले रु. चार करोड ७९ लाख ४० हजार ३३४ मा ठेक्का सम्झौता गरेको थियो । सम्झौता अनुसार २०७९ असार १५ गतेभित्र भवन निर्माण सम्पन्न गर्ने लक्ष्य थियो । हालसम्म एक चौथाई २५ प्र्रतिशत भवन निर्माण सकिएको गाउँपालिकाका प्राविधिक शाखा प्रमुख लोकेन्द्र रावलले बताउनुभयो ।
पाँच शैया क्षमताको अस्पतालका लागि दुई तले १६ कोठे दुई तले भवन निर्माण गर्न लागिएको हो । गाउँपालिकाले भवन निर्माणलाई निरन्तरता दिन कम्पनीलाई ताकेता र कालो सूचिमा राखेर कारबाहीको प्रक्रीया अघि बढाएपछि काममा फर्किएका हुन् ।
भौगोलिक विकटता र निर्माण सामग्री ढुवानीमा समस्याका साथै व्यवसायीले उपकरण र मजदुर परिचालन गर्न नसक्दा भवन निर्माणको काम वर्षसम्म रोकिएको थियो । “निरन्तर ताकेता र समन्वय गरेपछि भवन निर्माणको काम अघि बढेको छ,” गाउँपालिकाका अध्यक्ष प्रेमप्रसाद पुनले भन्नुभयो “काम गर्ने वातावरण बनाएका छौ । जति सक्दो छिटो भवन सम्पन्न गराउन पहल गरेका छौ ।”
आकस्मिक, अन्तरंग, बहिरंग, प्रयोगशाला, प्रशासनिक, औषधी भण्डारण, उपचारका लागि छुट्टा–छुट्टै कक्ष सहितको भूकम्प प्रतिरोधी क्षमताको अपाङ्गमैत्री भवन बनाउन लागिएको हो । समयमै भवन नबन्दा अस्पताल सञ्चालनको तयारी प्रभावित बनेको छ ।
ठेकेदार कम्पनीले जग्गा व्यवस्थापन सकेर पिल्लर ठड्याइ भुइँ ढलान डिपिसीको काम गरेको छ । पर्खाल निर्माण र भुई तला ढलानको तयारी गरेका छन् । वि.स. २०७७ पुष २२ गते प्रतिनिधि सभा सदस्य भुपेन्द्रबहादुर थापाले शिलन्यास गर्नुभएको थियो । भवनको २०८० जेठ सम्म म्याद थपिएको छ ।
निर्माण कम्पनीले गाउँपालिकाबाट १९ प्रतिशत रु. ९२ लाख ५० हजार रकम भुक्तानी लगेको छ । संघीय सरकारको सबै पालिकामा आधारभूत तहको अस्पताल सञ्चालन गर्ने योजना अनुसार ताकममा भवन निर्माण हुन लागेको हो ।
