बेनी, । अन्तराष्ट्रिय महिला दिवसका अवसरमा पर्यटन प्रर्वद्धन कार्यक्रम लिएर पर्यटन व्यवसायी महिला संघ नेपाल(टेवान) पोखराको टोली बुधबार म्याग्दीको बेनीमा आएका छन् ।
म्याग्दी र मुस्ताङको कोरला नाकासम्म पर्यटन प्रवद्र्धनका लागि पोखराबाट आएको टोलीले बेनीमा जनप्रतिनिधि, महिला अगुवा र सरोकारवालाहरुसँग अन्तरक्रीया गरेका छन् । कोरोना लगायतका विभिन्न कारणले सुस्ताएको पर्यटनलाई पूर्ववत् अवस्थामा फर्काउने उद्देश्यले महिला दिवसका अवसरमा कार्यक्रम आयोजना गरेको टेवानकी अध्यक्ष कमला गिरीले बताउनुभयो ।
“स्थानीय पर्यटन व्यवसायीका लागि क्षमता अभिबृद्धि, डिजिटल मार्केटिङ तालिम एवम् स्थानीय उत्पादनको ब्राण्डिङ र घरवास प्रवद्र्धन गर्ने कार्यक्रमको उद्देश्य हो,” उहाँले भन्नुभयो “पोखरा घुम्न आउने पर्यटकको बसाई लम्बाउन म्याग्दी र मुस्ताङका गन्तब्य पहिचान गर्नुपर्ने हाम्रो कार्यक्रमको लक्ष्य रहेको छ ।”
नेपाल पर्यटन बोर्ड, उद्योग पर्यटन वन तथा वातावरण मन्त्रालय गण्डकी प्रदेश र पोखरा महानगरपालिकाको सहयोगमा आयोजना गरिएको प्रवद्र्धनात्मक टोलीमा पर्यटनसम्बद्ध संघ संस्थाका प्रतिनिधि, सञ्चारकर्मी सहित ३२ जनाको सहभागिता रहेको छ ।
बेनीमा भएको अन्तरक्रियामा नेपाल उद्योग वाणिज्य महासंघका पुर्व उपाध्यक्ष तथा पोखरा महानगर पालिकाका सल्लाहकार संयोजक आनन्दराज मुल्मीले पोखरामा आउने पर्यटकको बसाई लम्बाउन छिमेकी जिल्लाका पर्यटकीय गन्तब्यको पहिचान, विकास र प्रर्वद्धन गर्न पहल गरिएको बताउनुभयो ।
धवलागिरी र अन्नपूर्ण हिमालको आधार शिविरलाई नयाँ गन्तब्यको रुपमा विकास गराउन सकेमा सडक विस्तारसँग छोटिएको गण्डकी प्रदेशको महत्वपूर्ण अन्नपूर्ण चक्रीय पदमार्गको विकल्प बन्न सक्ने बताउनुभयो ।
पोखरा पर्यटन परिषद्का महासचिव सञ्जयकान्त सिग्देलले पोखरा अन्तराष्ट्रिय विमानस्थल बनेकाले म्याग्दी, मुस्ताङमा उत्पादन हुने आलु, स्याउ, सुन्तला, टिमुर, अल्लोका कपडा, फापर आदीको अन्तराष्ट्रिय बजारीकरणमा जोड दिनुभयो ।
बेनी नगरपालिकाका प्रमुख सुरत केसी, उपप्रमुख ज्योती लामिछानेले मुस्ताङ जाने आउने पर्यटकको बेनीमा बसाई लम्बाउन ऐतिहाँसिक बेनीकोत, लभ्लिहिल, रावणको जन्मथलो पछै, जगन्नाथ, ज्यामरुककोट, रत्नेचौर, गलेश्वर, देवशिला उत्खनन् स्थल र तातोपानी कुण्ड लगायत धार्मिक पर्यटकीय गन्तब्यको विकासमा जोड दिएको बताउनुभयो ।
