देविस्थान, । म्याग्दीको मालिका गाउँपालिका–५ उदिनखोला र ओखरबोट जोड्ने देउता भिर पटक सामुदायिक झोलुङ्गे पुल निर्माण भएको छ ।
साङगखोला माथि निर्माण भएको एक सय मिटर लामो पुलको विहिबार एक कार्यक्रमका विच गाउँपालिका अध्यक्ष बेगप्रसाद गर्बुजा र स्थानीय जेष्ठ नागरिक मनभक्त सिउंथानीले संयुक्त रुपमा उद्घाटन गर्नुभयो । पुल निर्माण भएपछि स्थानीयलाई आवजावत र सामान ढुवानी गर्न सहज भएको छ । यसअघि बर्षातको समयमा आवतजावत गर्न समस्या हुने गरेको थियो । गत बर्ष माघ महिनादेखि पुल निर्माण सुरु भएको थियो ।
उपभोक्ता समिति अध्यक्ष शङकर फगामीका अनुसार रु. ५१ लाख १८ हजार ७१५ को लागतमा पुल निर्माण भएको हो । मालिका गाउँपालिका र झोलुङ्गे पुल क्षेत्रगत कार्यक्रम स्वापको आर्थिक सहयोग, टीबिएसयु पोखरा, पिटीएपी पोखरा तथा मिलन म्याग्दीको प्राविधिक र सामाजिक सहयोगमा पुल निर्माण गरिएको हो ।
पुल निर्माण गर्दा स्थानीयबासीले कुल लागतको दुई प्रतिशत श्रमदान गरेका छन् । कार्यक्रममा अध्यक्ष गर्बुजाले पुल निर्माण कार्यमा सहयोग गर्नेलाई धन्यवाद ज्ञापन गर्नुका साथै सबै एकजुट भएमा विकास तीव्र र दिगो हुने पनि बताउनुभयो । उहाँले वडा नम्बर ५ र धवलागिरी गाउँपालिका–७, जोड्ने लामो झोलुङ्गे पुल निर्माणको लागि प्रक्रिया थालिएको बताउनुभयो । उहाँले गाउँपालिकाले शिक्षा, स्वास्थ्य, कृषी लगायत क्षेत्रलाई प्राथमिकता दिएर काम गरिरहेको बताउनुभयो ।
मिलन म्याग्दीकी कार्यकारी निर्देशक दिलमाया विटालुले पुल निर्माण भएपछि स्थानीयबासीलाई थप सहज भएको बताउनुभयो । उहाँका अनुसार मालिका गाउँपालिकाका विभिन्न ठाउँमा पाँच वटा झोलुङ्गे पुल निर्माणाधीन अवस्थामा रहेका छन् । कार्यक्रममा पिटिएपीका प्राविधिक अधिकृत दयाराम शाह लगायतले बोल्नुभएको थियो । उपभोक्ता समितिका सचिव भिमप्रसाद सिंथानीले संचालन गर्नुभएको कार्यक्रममा स्थानीय विनोद फगामीले स्वागत गर्नुभएको थियो ।
