बेनी, म्याग्दीको अन्नपूर्ण गाउँपालिका–४ नारच्याङमा निर्माणाधिन निलगिरी दोस्रो ‘क्यासकेड’ जलविद्युत आयोजनाको सुरुङ ‘ब्रेक थु्रु’ भएको छ ।
निलगिरीखोला हाइड्रोपावर प्रर्वद्धक रहेको ७१ मेगावाट क्षमताको आयोजनाको चार हजार २७५ मिटर सुरुङ निर्माण बिहिबार जोडिएको हो । आयोजनाका ईञ्जिनियर केशव वाग्लेले पाँच वटा अडिटबाट सुरुङ खनिएको जानकारी दिनुभयो ।
नारच्याङको दोभान स्थित विद्युतगृह र छोटेपाको बाँधतर्फबाट वि.स. २०७६ देखि सुरुङ निर्माण थालिएको थियो । सुरुङ निर्माणलाई जलविद्युत आयोजनाको मुख्य काम मान्ने गरिएको छ ।
ब्रेक थु्रु भएको अवसरमा आयोजनाका प्रर्वद्धक, प्राबिधिक, कर्मचारी, परामर्शदाता र निर्माण कम्पनीका प्रतिनिधीले खुसीयाली मनाएका थिए । “ब्रेक थ्रु भएको टनेलको फिनिसिङ गर्ने तयारी छ,” ईञ्जिनियर वाग्लेले भन्नुभयो “बाँध र विद्युतगृह निर्माण तथा इलेक्ट्रोमेकानिकलको कामलाई तिब्रता दिएका छौ ।”
३८.७ मेगावाटको निलगिरी पहिलोको विद्युतगृहबाट निस्कने पानीलाई बाँध बनाएर निलगिरि क्यासकेडको सुरुङमा हाल्न मिल्ने गरी संरचना निर्माण भइरहेको छ । दुई वटै आयोजनाको प्रर्वद्धक एउटै निलगिरी हाइड्रोपावर हो ।
निलगिरी पहिलोको हुमखोलामा बाँध र छोटेपामा विद्युतगृह निर्माण थालिएका ईञ्जिनियर वाग्लेले बताउनुभयो । क्यासकेडको विद्युतगृह देखि निलगिरी पहिलोको बाँध हुमखोलासम्म १३ किलोमिटर पहुँचमार्ग निर्माण भएको छ । छोटेपामा ३० मिटर लामो बेलिब्रिज निर्माण गरेको छ ।
बस्ती देखि टाढा रहेको निलगिरीखोला जलबिद्युत आयोजना निर्माण स्थल भौगोलिक रुपमा बिकट र दुर्गम क्षेत्रमा पर्छ । रु. तेह् अरब लागत अनुमान गरिएको दुवै आयोजना रन अफ द रिभर प्रकृतिका हुन् ।
निलिगिरीखोलाबाट उत्पादन भएको बिजुली २२० केभी क्षमताको दाना सवस्टेशनबाट केन्द्रिय ग्रिडमा जोडिन्छ । छोटेपा–दोबिल्ना हुदै दाना सब स्टेशन जोड्ने ७.४ किलोमिटर दुरीको २२० केभी क्षमताको प्रशारण लाइन निर्माण भइरहेको छ ।
