बेनी । म्याग्दीको उत्तरी क्षेत्र हुदै हिमालपारीको जिल्ला मुस्ताङलाई राष्ट्रिय राजमार्गसँग जोड्ने बेनी–जोमसोम सडक शनिबार विहान देखि अवरुद्ध भएको छ ।
म्याग्दी र मुस्ताङको सिमानामा पर्ने काभ्रेभिरमा गएराती पहिरो खसेपछि ७६ किलोमिटर दुरिको बेनी–जोमसोम सडकमा सिधा यातायात सञ्चालन बन्द भएको हो ।
बेनी–जोमसोम–कोरला सडक आयोजनाका सुपरभाइजर ईन्द्रसिंह शेरचनले सडकको बिचमा ठुलो ढुङ्गा खरेर अवरोध गरेको बताउनुभयो । “सडक विस्तारका लागि वलास्टिङ गरेर छाडिएको छ,” उहाँले भन्नुभयो “राती पहिरो खसेर सवारी आवत जावत गर्न नसक्ने भएको छ ।”
सडक स्तरोन्नतिको ठेकेदार कम्पनी शर्मा–गजुरमुखीको डोजर परिचालन गरेपनि सफल नभएपछि बिस्फोटक पदार्थको प्रयोग गरेर ढुङ्गा फुटाउन सडक आयोजना मार्फत जिल्ला प्रशासन कार्यालयमा प्रस्ताव गरिएको छ ।
नेपाली सेनाको टोलीलाई बिस्फोटक पदार्थको प्रयोग गरेर ढुङ्गा फुटाई सडक खुलाउन काभ्रेभिर पठाइएको जिल्ला प्रशासन कार्यालयले जनाएको छ । सडक अवरुद्ध हुदाँ बेनीबाट मुस्ताङ तर्फ र मुस्ताङबाट म्याग्दीतर्फ आउने जाने सवारी साधन बिच सडकमा रोखिएका छन् ।
अत्यावश्यक कामले गन्तब्यमा पुग्नुपर्नेहरु सवारी साधन परिवर्तन गरेर यात्रा गर्न बाध्य छन् । स्थानीयबासी, मुस्ताङ घुम्ने पर्यटक र मुक्तिनाथ दर्शनका लागि आउने र जाने भक्तजनलाई समस्या भएको छ ।
