बेनी । पर्वतको जलजला गाउँपालिकाको वारीबेनीमा मंगलबार बजार अनुगमन गरिएको छ ।
घरेलु तथा साना उद्योग कार्यालय पर्वतको आयोजनामा वारीबेनीका खाद्यान्न तथा किराना पसलहरुको अनुगमन गरिएको हो । घरेलु तथा साना उद्योग कार्यालयका प्रमुख मुना अधिकारीको नेतृत्वमा १३ वटा पसल अनुगमन भएको थियो ।
जिल्ला प्रशासन कार्यालय, मिलनचोक र वारीवेनी प्रहरी चौकी, गाउँपालिका, उद्योग वाणिज्य संघ र नेपाल पत्रकार महासंघका प्रतिनिधीहरुको टोलीले अनुगमन गर्नुभएको थियो । पसलमा बिक्रीका लागि राखिएको १३ केजी सुजी, १८ पोका सोइविन र दुई दर्जन विस्कुट बरामद गरेर नष्ट गरिएको छ ।
कार्यालय प्रमुख अधिकारीले वारीबेनीका धेरै जसोले व्यवसाय दर्ता गरिसकेका र पहिलेको तुलनामा बजार सुधार भएको पाइएको बताउनुभयो । यसअघि बजार अनुगमनका क्रममा ठूलो परिणाममा म्याद नाघेका खाद्यबस्तु बरामद भएको थियो ।
ग्रहाकले देख्ने गरी मूल्य सूचि राख्न, म्याद नाघेका बस्तु बिक्री कक्षबाट हटाउन र सरसफाईमा ध्यान दिन अनुगमन टोलीले सुझाव दिएको छ ।
