बेनी, । म्याग्दीको मंगला गाउँपालिका–५ अर्मनको पिपलबोटमा धार्मिक वन स्थापना भएको छ ।
सार्वजनिक जग्गाको संरक्षण र वन विकास मार्फत पर्यटन विकास गर्ने उद्देश्यले पिपलबोटको कैलाशफाँटमा धार्मिक वन स्थापना गरिएको हो । १.०६५ हेक्टर क्षेत्रफलमा फैलिएको वन आइतबार समुदायलाई हस्तान्तरण गरिएको डिभिजन वन कार्यालय, म्याग्दीले जनाएको छ ।
डिभिजन वन कार्यालय, म्याग्दीका प्रमुख मनोज रानाभाटले विश्व वातावरण दिवसको अवसरमा औपचारिक रुपमा धार्मिक वन समुदायलाई हस्तान्तरण गरिएको जानकारी दिनुभयो । “नापचाँज, क्षेत्रफल पहिचान, विधान, कार्ययोजना र समूह दता लगायत सवै प्रक्रीया पुरा गरेर हस्तान्तरण गरेका हौ,” उहाँले भन्नुभयो “वन विकास, जैविक विविधता र वातावरण संरक्षणसँगै धार्मिक पर्यटन विकास गर्ने उद्देश्यले धार्मिक वन बनाएका हौ ।”
प्राचिन समयमा ऋषिमुनीहरुले तपस्या गरेर ज्ञान आर्जन गरेको कैलाशफाँटमा शिव मन्दिर रहेको छ । म्याग्दी नदी किनारको शिव मन्दिर परिसरको बगर र सार्वजनिक जग्गा संरक्षण गरेर वृक्षारोपण गरेर वन बनाइएको समुहका अध्यक्ष छवीलाल कडेलले बताउनुभयो । वातावरण दिवसको अवसरमा वनमा १०८ पिपलका विरुवा रोपिएको छ । घेराबार र संरक्षणका लागि डिभिजन वन कार्यालयले चालू आर्थिक वर्षमा रु. तीन लाख सहयोग गरेको छ ।
एकै ठाउँमा १०८ वटा पिपलको विरुवा भएको ठाउँमा पुजाआजा गरेमा मोक्ष प्राप्त हुने धार्मिक विश्वास छ । यसअघि स्थानीयवासीहरु १०८ पिपलको पुजा गर्न बागलुङको वलेवा पुग्ने गरेका थिए । कैलाशफाँट धार्मिक वन जिल्लाको दोस्रो हो । यसअघि बेनी नगरपालिका–३ भकिम्लीमा धार्मिक वन समुदायलाई हस्तान्तरण गरिएको थियो ।
म्याग्दी जिल्लाभर ३१८ वटा सामुदायिक वन उपभोक्तालाई हस्तान्तरण गरिएको छ । जिल्ला समन्वय समितिका प्रमुख देवेन्द्र केसी, मंगला गाउँपालिकाका अध्यक्ष सतप्रसाद रोका, प्रमुख जिल्ला अधिकारी चिरञ्जिवी राना, प्रहरी नायव उपरीक्षक तिलक भारती, वडा अध्यक्ष भुपेन्द्र खत्री लगायतको उपस्थितिमा वन हस्तान्तरण र पिपलका विरुवा रोपिएको सहायक वन अधिकृत चन्द्रमणी सापकोटाले बताउनुभयो ।
