बेनी, म्याग्दीको अन्नपूर्ण गाउँपालिका वडा नम्बर ७ हिस्तानको वडा अध्यक्षमा नेकपा एमालेका उमेद्वार माइलन पुर्जा पुन निर्वाचित हुनुभएको छ ।
२८ वर्षीय माइलनले ३९८ मत ल्याएर वडा अध्यक्षमा निर्वाचित हुनुभएको हो । माइलनका प्रतिस्पर्धी नेपाली काँग्रेसका उमेदवार गमबहादुर फगामीले २२८ मत पाउनुभयो । फगामी यसअघिको वडा अध्यक्ष हुनुहुन्थ्यो । माइलन सम्भवत म्याग्दीका सबैभन्दा कम उमेरका वडा अध्यक्ष हुनुहुन्छ ।
सो वडाको सदस्यहरमा एमालेका गेमबहादुर पुन, वुद्धीबहादुर पुन, सम्झना पौडेल र काँग्रेसकी उर्मिला पुन पाइजा निर्वाचित हुनुभएको छ । आठ वटा वडा रहेको अन्नपूर्ण गाउँपालिकाको वडा नम्बर ८ राम्चेको मतगणना हुँदा बाँकी छ ।
सात वटा वडाको मतगणना सकिदाँसम्म गाउँपालिका अध्यक्षमा एमालेका भारतकुमार पुनले तीन हजार ५१९, काँग्रेसका बलबहादुर तिलिजाले दुई हजार ९८६, उपाध्यक्षमा एमालेकी दिवाकुमारी तिलिजा पुनले तीन हजार ५६० र काँग्रेसकी ललिता तिलिजाले दुई हजार ९४४ मत पाउनुभयो ।
