घोडेपानी । चारैतिर घना गुराँसको जंगलको बिचमा रहेको वस्ती । घरको झ्यालबाटै जंगलको पृष्ठभूमिमा लहरै देखिने हिमाल । पहाडको अग्लो स्थान । शान्त वातावरण । पाखाभरी ढकमक्क फुलेका लालीगुराँस । बिहान सुर्योदय र साँझमा सुर्यास्तको मनमोहक दृष्य अवलोकन गर्न सकिने ।
म्याग्दीको अन्नपूर्ण गाउँपालिका–६ मा रहेको घोडेपानी पुनहिल क्षेत्र प्राकृतिक सौन्दर्यले भरिपुर्ण र मनोरम छ । वसन्त ऋतुको आगमनसँगै फुलेका लालीगुराँसले अझै मनमोहक र आकर्षक बनाएको घोडेपानी टोल सुधार समितिका संयोजक बिरेन गर्बुजा पुनले बताउनुभयो ।
“घोडेपानी लालीगुराँसले ढकमक्क भइसकेको छ,” उहाँले भन्नुभयो “हामी पर्यटकको पर्खाइमा छौ । पर्यटकलाई स्वागत गर्न आतुर छौ ।” जाडो हटेको र वनजंगलमा लालीगुराँस फुलेपछि रमाइलो वातावरण बनेको छ । चैत–बैशाख गुराँस फुल्ने याम हो । यहाँ रातो, सेतो, चिमाली, सिमाली लगायत जातका गुराँस पाइन्छ ।
पाखोमा फुलेका गुराँसको जंगलको पृष्ठभूमिमा धौलागिरि, गुर्जा, अन्नपूर्ण, माछापुच्छ्रे लगायत १६ भन्दा बढी हिमाल र सुर्योदयको दृष्य अवलोकन गर्न सकिन्छ । विश्वमा ४२ प्रजातिको गुराँस पाईन्छ । नेपालमा ३२ प्रताजीका छन् । घोडेपानी क्षेत्रमा १६ प्रजातीका लालीगुराँस पाईने अध्ययन प्रतिवेदनहरुमा उल्लेख छ ।
लालीगुराँस नेपालको राष्ट्रिय फुल पनि हो । एकै स्थानमा धेरै प्रजातिका गुराँस पाईने यस क्षेत्रको जंगल गण्डकी प्रदेशकै ठूलो भएको स्थानीयवासी समेत रहनुभएका अन्नपूर्ण गाउँपालिकाका अध्यक्ष डमबहादुर पुनले बताउनुभयो ।
“वनैभरी राताम्मे फुलेका गुराँसका रंगले घोडेपानी क्षेत्रको जंगल निकै मनमोहक र आकर्षक बनेको छ,” स्थानीयवासी समेत रहेका अध्यक्ष पुनले भन्नुभयो “गुराँसले भरिएको जंगलमा भ्रमण गर्न र प्राकृतिक सौन्दर्यमा रमाउन आउने पर्यटकको चहलपहल बढेको छ ।”
बेनी, बागलुङ, पोखरा, चितवन, काठमाडौ लगायत क्षेत्रबाट बिद्यार्थी, कर्मचारी र ब्यापारीहरु समूह बनाएर घोडेपानी भ्रमणमा आएका छन् । घोडेपानी पर्यटक प्रहरी कार्यालयका प्रमुख प्रहरी नायव निरीक्षक प्रेमराज गौलीका अनुसार दैनिक ६०÷७० जना विदेशी र १०० जना नेपाली पर्यटकहरु भ्रमणमा आएका छन् ।
“घोडेपानी–पुनहिल घुम्न आउने विदेशी पर्यटकको तथ्याङ्क हामीले राख्ने गरेका छौ,” उहाँले भन्नुभयो “कोरोना महामारी फैलिएपछि २०७६ चैत देखि रोकिएको पर्यटकको उपस्थिति गत फागुन देखि हुन थालेको छ ।”
काठमाडौवाट आठ जनाको समूहमा घोडेपानी घुम्न आउनुभएकी अक्षता भट्टराईले बजार देखि टाढाको एकान्त वातावरण र गुराँसले रंगिएको जंगलमा पदैलयात्रा गर्दा रमाइलो महशुस भएको बताउनुभयो । गुराँस, पहाड, हिमाल, सुर्योदयको दृष्यबाट मोहित भएको चितवनकी पुनम खरेलले अनुभव सुनाउनुभयो ।
फागुन महिनासम्म सुनसान घोडेपानीमा गुराँस फुल्न थालेपछि चहलपहल बढेको घोडेपानी होटल व्यवस्थापन उपसमितिका अध्यक्ष मिना पुनले बताउनुभयो । “स्वदेशी पर्यटकलाई आकर्षित गर्न सहुलियतको ब्यवस्था मिलाएका छौ,” उहाँले भन्नुभयो “घोडेपानीमा रहेका २७ वटा होटललाई सुविधा र पुर्वाधारको आधारमा दुई समूहमा वर्गीकरण गरेका छौ । ११ वटा होटललाई (क) र १६ वटालाई (ख) समूहमा वर्गिकरण गरेर फरक फरक दररेट बनाइएको हो ।”
एक रात वास बसेको, बेलुकाको खाना, बिहानको खाजा सहित रु. ९५० देखि एक हजार ६०० को प्याकेज बनाएका हुन् । यसअघि सबै होटलहरुले प्रतिव्यक्ति एक रात वास बसेको, बेलुकाको खाना र बिहानको खाजाको रु. एक हजार पाँच सय शुल्क लिने गरेका थिए ।
घोडेपानीका होटलमा दैनिक एक हजार जना भन्दा बढी वास बस्न सक्छन् । फागुन २८ गतेको बैठकले गरेको होटल वर्गीकरण र शूल्कको नयाँ दररेट २०७८ चैत १ गतेदेखि लागु हुने उपसिमतिका अध्यक्ष पुनले बताउनुभयो ।
अन्नपुर्ण चक्रीय पदमार्गको प्रमुख गन्तब्य घोडेपानी समुन्द्रि सतहदेखि दुई हजार आठ सय मिटरको उचाइमा अवस्थित छ । घोडेपानी देखि ३० मिनेट उकालो हिडेपछि पुनहिल पुग्न सकिन्छ । समुन्द्रि सतहदेखि तीन हजार २०० मिटर उचाइमा रहेको पुनहिलबाट सुर्योदय, हिमाल र लालीगुराँसको जंगल अवलोकन गर्न आउने पर्यटक घोडेपानीमा वास बस्ने गर्छन् ।
