बेनी । नेकपा एमाले मंगला गाउँपालिका कमिटिको आयोजनामा सोमवार बाबियाचौरमा अगुवा कार्यकर्ता प्रशिक्षण कार्यक्रम सम्पन्न भएको छ ।
नेकपा एमाले गण्डकी प्रदेश कमिटिका सचिवालय सदस्य हरिकृष्ण श्रेष्ठ, जिल्ला कमिटि उपाध्यक्ष बालकृष्ण सुवेदी र उपसचिव राजकुमार थापाले प्रशिक्षण दिनुभएको हो ।
श्रेष्ठले महाधिवेशनबाट पारित सिद्धान्त, कार्यक्रम तथा कार्यदिशाको बिषयमा, सुवेदीले संगठनको काम, भूमिका र जिम्मेवारीको बिषयमा र थापाले स्थानीय तह निर्वाचनको तयारीका बिषयमा प्रशिक्षण दिनुभएको पालिका कमिटि सचिव चिरञ्जीवि शर्माले जानकारी दिनुभयो ।
एमालेको नेतृत्वमा स्थानीय सरकार संचालन भएको मंगलामा यो पाँच बर्षमा रहर लाग्दो विकास भएको भन्दै समृद्ध मंगलाको परिकल्पनालाई पूर्णता दिनका लागि एकपटक फेरी एमालेलाई जिताउन आवश्यक रहेको श्रेष्ठले बताउनुभयो ।
नेकपा एमाले मंगला गाउँपालिका कमिटिका अध्यक्ष सतप्रसाद रोकाले आसन्न स्थानीय तहको निर्वाचनलाई लक्षित गरि पालिकाका टोल टोलमा पुगेर संगठन निर्माण तथा प्रशिक्षण कार्यक्रमलाई तिव्रताका साथ अगाडि बढाईएको बताउनुभयो ।
रोकाले गाउँटोलमा चुनावि सक्रियता बढाउनका लागि वडा कमिटि तथा टोल कमिटिहरुलाई अनुरोध समेत गर्नुभएको छ । कार्यक्रममा मंगला गाउँपालिकाका ५ वटै वडाका अगुवा नेता तथा कार्यकर्ताहरुको उपस्थिति रहेको उपाध्यक्ष प्रेमा अधिकारीले बताउनुभयो ।
