बेनी । म्याग्दीका ३५ वटा बिद्यालयमा भवन निर्माण र सूचना प्रबिधिका उपकरण जडानका लागि चालु आर्थिक बर्षमा रु. छ करोड ३१ लाख बिनियोजन भएको छ ।
राष्ट्रपति शैक्षिक सुधार कार्यक्रम अन्तरगत शिक्षा, बिज्ञान तथा प्रबिधी मन्त्रालयले दश वटा चार कोठे, १३ वटा दुई कोठे भवन र १४ बिद्यालयमा सूचना प्रबिधि कक्ष स्थापना गर्न सो बजेट बिनियोजन गरेको हो ।
जिल्ला शिक्षा बिकास तथा समन्वय इकाई म्याग्दीका प्रमुख दलबहादुर थापाले सुचना प्रबिधिको कार्यक्रमका लागि रु. छ लाख पचास हजार, दुई कोठे भवन निर्माणका लागि रु. १८ लाख र चार कोठे भवन बनाउन रु. ३६ लाखका दरले बजेट बिनियोजन भएको हो ।
“मन्त्रालयले जारी गरेको सूचना अनुसार पेश भएका मध्य छनौट भएका बिद्यालयले प्रस्ताव अनुसार बजेट पाउनेछन्,” उहाँले भन्नुभयो “सम्बन्धित स्थानीय तह मार्फत कार्यक्रम कार्यान्वयन हुने कार्यबिधी छ ।”
चार कोठे भवन निर्माणका लागि रु. ३६ लाखका दरले अनुदान पाउने बिद्यालयमा जनजागृति माबि, जनबिकास माबि, अमरज्योति माबि, धौलागिरी आधारभूत, भुवानी आधारभूत, शिद्धशान्ति माबि, सारदा आभारभूत, हंशबाहिनी आधारभूत र भानु माबि रहेका छन् ।
यसैगरी बेनपा–५ को सरस्वती आधारभूत, नवज्योति आधारभूत, थाकनपोखरी, बेनपा–२ को सरस्वती आधारभूत, जडभरत शालग्राम गण्डकी संस्कृति माबि, बिष्णु राष्ट्रिय माबि, नारच्याङ आधारभूत, पार्वति आधारभूत, सिद्धार्थ ज्ञानमन्दिर आधारभूत, ओखरबोट माबि, राम्चे र महेन्द्र आधारभूत बिद्यालय छन् ।
ताकम माबि, बुद्धिबिकास माबि, जनप्रिय माबि, गौबमबस्त माबि, मालिका आधारभुत, सद्धार्थ माबि, रघुगंगा माबि, जनता माबि, हिमाञ्जल माबि, कैलाश माबि, त्रिभुवन मंगला माबि, जयन्ति माबि, राष्ट्रिय माबि र दिपक माबिले सूचना प्रबिधि सम्बन्धी कार्यक्रम अन्तरगत कम्प्युटर प्रयोगशाला, इन्टरनेट जडान लगायतका कार्यका लागि रु. छ लाख पचास हजारका दरले अनुदान पाउने भएका छन् ।
स्थानीय तहहरुले छनौट भएका बिद्यालयमा उपभोक्ता समिति गठन गरेर उनिहरुसँग सम्झौता गरी योजना तथा कार्यक्रम कार्यान्वयन गर्नेछन् ।
