धौलागिरि खबर

दाना–खुर्कोट प्रशारण लाइनको सबै टावर ठडिए

पोखरेबगर, म्याग्दीको अन्नपूर्ण गाउँपालिका–३ दाना देखि पर्वतको खुर्कोट जोड्ने २२० केभी क्षमताको बिद्युत प्रशारण लाइन आयोजनाको सबै टावर निर्माण सकिएको छ । प्रशारण लाइनको तार तान्ने र सबस्टेशनमा जडान गरिएका उपकरणको परिक्षण अन्तिम चरणमा पुगेको छ ।

नेपाल बिद्युत प्राधिकरणले कालीगण्डकी कोरीडोर आयोजना अन्तरगत दाना र खुर्कोटमा सब स्टेशनका साथै प्रशारण लाइन निर्माणको काम अन्तिम चरणमा पु¥याएको हो । आयोजना प्रमुख चन्दनकुमार घोषले ११० वटा मध्य सबै टावर निर्माण भइसकेको जानकारी दिनुभयो ।

“टावर ठडाउने, तार तान्ने र सबस्टेशनको उपकरण जडान गरिएको छ,” उहाँले भन्नुभयो “फिनिसिङ र परिक्षण सकेपछि एक हप्ताभित्र प्रशारण लाइन र सबस्टेशन सञ्चालन गर्न सकिन्छ ।” दाना देखि खुर्कोट सम्म करिब ३९ किलोमिटर दुरीको प्रशारण लाइन निर्माण भएको हो ।

म्याग्दीको उत्तरी क्षेत्र भएर बग्ने कालीगण्डकी तथा सहायक नदी र मुस्ताङमा निर्माण हुने जलविद्युत आयोजनाबाट उत्पादीत बिजुली केन्द्रिय ग्रिडमा जोड्न एशियाली विकास बैङ्कको सहयोगमा प्रशारण लाइनका साथै दाना र खुर्कोटमा सब स्टेशन निर्माण भएको हो ।

प्रशारण लाइन र सबस्टेशन बनाउन सन् २०१६ मा रु. दुई अर्ब ९० करोडमा टाटा प्रोजेक्ट्स र चिन्ट इलेक्ट्रिक जेभीसँग ठेक्का सम्झौता भएको थियो । २०१८ को नोभेम्बरमा सम्पन्न गर्ने लक्ष्य राखिएको आयोजना दुई वर्ष वर्ष ढिला गरि सकिन लागेको हो ।

पोखरेबगर क्षेत्रमा जग्गाधनीसंगको बिवाद र वन क्षेत्रको जग्गा प्राप्तिमा भएको ढिलाइले आयोजना निर्माण दुई वर्ष पछि ढकेलिएको हो । धेरै समयको प्रयासमा पोखरेबगरको बिवाद समाधान गरेर आयोजना निर्माण गर्ने वातावरण बनाएको म्याग्दीका प्रमुख जिल्ला अधिकारी उमाकान्त अधिकारीले बताउनुभयो ।

आयोजना निर्माणसँगै ४२ मेगावाट क्षमताको मिस्ट्रीखोला, ५ मेगावाटको घलेम्दीखोला र १३.६ मेगावाट क्षमताको थापाखोला जलबिद्युत आयोजनाको बिद्युत केन्द्रीय लाइनमा जोडिने अन्नपूर्ण गाउँपालिकाका अध्यक्ष डमबहादुर पुनले बताउनुभयो । थापाखोला र घलेम्दी यसअघिनै निर्माण सम्पन्न भएपनि प्रशारण लाइनको अभावमा पुर्ण क्षमतामा सञ्चालन हुन सकेका थिएनन् ।

निर्माणको अन्तिम चरणमा पुगेको मिस्ट्रिखोला जलबिद्युत आयोजनाले प्रशारण लाइन र सबस्टेशनसँगै सञ्चालन गर्ने तयारीमा छ । प्रशारण लाइन र सबस्टेशन बनेपछि अनुमति लिएर बसेका अन्य आयाजनाले पनि गति लिने अध्यक्ष पुनले बताउनुभयो ।

प्रतिक्रिया दिनुहोस
Loading...