धौलागिरि खबर

आज रातीदेखि पाँच दिन भारी बर्षा हुने, सतर्कता अपनाउन प्रशासनको आग्रह

बेनी । सोमबार रातीदेखि पाँच दिन देशको धेरै स्थानमा हावाहुरीसहित भारी वर्षाको सम्भावना रहेको जल तथा मौसम विज्ञान विभागले जनाएको छ ।

विभागले एक विशेष बुलेटन जारी गर्दै उत्तर­पूर्व बङ्गालको खाडीमा रहेको न्यून चापीय क्षेत्र उत्तर–पश्चिमतर्फ सर्ने क्रममा आगामी चार–पाँच दिनसम्म देशका धेरै स्थानमा भारी वर्षा हुनुका साथै हावाहुरीको समेत सम्भावना रहेकाले आवश्यक सतर्कता अपनाउन सबैमा अनुरोध गरेको छ ।

हाल देशभर सामान्यदेखि पूर्ण बदली रही केही स्थानमा मेघगर्जन र चट्याङ्गसहित हल्कादेखि मध्यम वर्षा भइरहेको छ । दिउँसो देशभर सामान्य बदली रही देशका केही स्थानमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको बताइएको छ ।

गृहमन्त्रालय अन्तरगतको राष्ट्रिय विपद् जोखिम न्युनीकरण बिभागको निर्देशन अनुसार म्याग्दीमा पहिरो तथा भूक्षयको जोखिम भएका र तटीय क्षेत्रमा सतकर्ता अपनाउन अनुरोध गरिएको प्रमुख जिल्ला अधिकारी उमाकान्त अधिकारीले बताउनुभयो ।

पहिरोको जोखिममा भएका बासिन्दाहरुलाई सुरक्षित ठाउँमा जाने तयारी गर्न, तटीय क्षेत्रमा सतकर्ता अपनाउन र खोला किनारमा नजान प्रजिअ अधिकारीले आग्रह गर्नुभएको छ । जिल्लाका छ वटै पालिकाका पदाधीकारीहरुलाई पनि प्रशासनले पुर्वतयारी गर्न आग्रह गरेको छ ।

प्रतिक्रिया दिनुहोस
Loading...